بانگەواز بۆ مامۆستایانی زانکۆ: سەرچاوەیەکی ئامادەکراو بۆ گفتوگۆکردن لەسەر ژیریی دەستکرد لە پۆلدا

مامۆستایانی بەڕێز،

ئایا نیگەرانی ئەوەن چۆن مامەڵە لەگەڵ بەکارهێنانی ئامرازەکانی ژیریی دەستکردی وەک – چات جی پی تی – لەلایەن خوێندکارانتانەوە بکەن؟ ئایا بەدوای ڕێگایەکدا دەگەڕێن کە لە قەدەغەکردنی ناکاریگەر و بێ پرسیار باشتر بێت؟

خۆشحاڵم بە ڕاگەیاندنی سەرچاوەیەکی نوێ و بەسوود کە ئێستا بە زمانی کوردی بەردەستە: کۆمەڵە سلایدێکی وانەوتنەوە بە ناونیشانی “ژیریی دەستکردی: دەستپێکێکی گرنگ.”

ئەم سلایدانە بە تایبەتی بۆ مامۆستایانی زانستە کۆمەڵایەتییەکان و ئەو بەشانەن کە گرنگی بە نووسین و خوێندنەوە دەدەن دانراون. ئامانج تێیدا کردنەوەی دەرگای گفتوگۆیەکی کراوە و گرنگە لەگەڵ قوتابیان لە سەرەتای ساڵی خوێندندا.

ئەم سلایدانە لەلایەن ‘د. کارلۆ پێرۆتا‘ـوە دروستکراون و لەلایەن ‘د. پەشێو م. نوری’ـەوە بەکوردیکراون. کارلۆ مامۆستایە لە زانکۆی مێلبۆرن، لێکۆڵێەر و مامۆستای بواری ژیریی دەستکرد و تەکنەلۆجیایە لە بواری پەروەردەدا. د. پەشێو لێکۆڵەر و ڕاوێژکاری پەروەردەییە و ئێستا مامۆستایە لە زانکۆی جیهان-سلێمانی.

ئەم سەرچاوەیە چی لەخۆدەگرێت؟

ڕوونکردنەوەیەکی سادە: GenAI چییە، چۆن کاردەکات، و چی نییە.

١. کاریگەرییەکان: باس لەوە دەکات کە بەکارهێنانی ژیریی دەستکرد چ کاریگەرییەکی لەسەر توانای فێربوون و بیرکردنەوەی قووڵ هەیە.

٢. ڕێنمایی کرداری: پێشنیارکردنی کۆمەڵێک یاسای “بکە و مەکە” بۆ بەکارهێنانی ئەخلاقیانەی ژیریی دەستکرد لە ئەرکە ئەکادیمییەکاندا.

٣. ئامانج: یارمەتیدانی مامۆستا و خوێندکار بۆ گەیشتن بە “گرێبەستێکی” نافەرمی ناو پۆل لەسەر چۆنیەتیی بەکارهێنانی ئەم تەکنەلۆژیایە بە شێوەیەکی بەرپرسیارانە.

لەبری ئەوەی بە تەنیا ڕووبەڕووی ئەم ئاڵنگارییە نوێیە ببنەوە، دەتوانن سوود لەم سلایدە ئامادەکراوانە وەربگرن بۆ دانانی بناغەیەکی پتەو بۆ بەکارهێنانێکی زیرەکانەی ژیریی دەستکرد لە کۆرسەکانتاندا.

دەتوانن سلایدەکان [لەم لینکە] دابەزێنن و لە یەکەم هەفتەی وانەکانتاندا بەکاریبهێنن بۆ دروستکردنی ژینگەیەکی ئەکادیمیی ڕەخنەگر.

بە هیوای ساڵێکی خوێندنی سەرکەوتوو.

https://drive.google.com/file/d/1MELYuj3XTuAyKRumsLqC-h2UGk3lskhT/view